“Bunu bütün rayon, qohum-əqraba bilir...” – Könül Kərimovadan açıqlama

16 2018 10:53

2017-ci ili ancaq qızının xeyir işi ilə bağlı məsələlərə həsr edən, baş qaşımağa vaxt tapmayan Könül Kərimova, toydan təxminən 2 ay sonra açıqlamalar etdi. Məclis haqda müzakirələrin hələ də davam etdiyi bir zamanada ifaçı yayılan söz-söhbətlərə də aydınlıq gətirdi. Hələlik oğlunu evləndirmək istəməyən Könül xanım, övladının musiqidən birdən-birə uzaqlaşma səbəbini də açıqladı.  

Ötən ilin noyabr ayında qızına toy edib gəlin köçürən müğənni Könül Kərimova, övladının yeni evində qəribçilik çəkmədiyini, hətta qızının yoxluğunu hiss etmədiyini söylədi.  

Könül Kərimova: “Ləman hər zaman öz otağına çəkilən, qapalı bir qız idi. Ona hərdən sual verirlər ki, sən necə qalacaqsan, rayon hara, sən hara? Elə özü yaxşı bir cavab verir, deyir ki, burda da dörd divar arasındayam, orda da dörd divar arasında oturmuşdum. Nə fərqi var ki? Qızım rahat həyatı sevən bir insan olmayıb”.

“Qızıma da, oğluma da deyirdim ki, ikinizdən biri gəlin mənimlə harasa gedək. Hərəsi bir bəhanə ilə aradan çıxırdılar. Həmişə də incikliyim onun üstündə olub. Ona görə də qızımın evdə olmamasına alışmışam. Birdən Ləmanın adını çəkəndə, kimsə soruşanda, o zaman dərk edirəm ki, qız evdə yoxdur”.

Müğənni “Şou məkan”a açıqlamasında qızının və kürəkəninin bir-birilərini sevib evləndiyini söyləsə də, sonradan Könül xanımın, qızını məcburi evləndirdiyi şaiyələri yayıldı.

Könül Kərimova: “İndi başqa dövrdür axı. Mən qızımı necə məcbur evləndirə bilərəm ki. Yaxınlarım deyirdi ki, bu evliliyə razılıq vermə! Ona görə deyirdilər ki, qız rayona gedəcək, bu mühitdən çıxıb o mühitə necə öyrəşəcək? Müəyyən çətinliklər vardı”.

“Mən yaxşı mənada çarəsiz qaldım. Onlar bir-birlərini sevməyə başladılar. Real bir şey etiraf edəcəm. Çünki bunu bütün rayon, qohum-əqraba bilir. Bu evliliyə ilk mənim istəyim olub. Əvvəlcədən kürəkənim qızımı, qızım da kürəkənimi görməmişdi”.

“Bizim uşaqlar qapalı böyüyüblər. Mən rayona hansısa məclisə gedəndə onlar mənimlə getmək istəməyiblər. Bir gün qızımla kürəkənim məclislərin birində üz-üzə gəldilər. Həmin mərasimdən sonra gördüm ki, qızım bir təhərdir”.

Bəziləri buna səbəb kimi Könül xanımın kürəkəninin məclis boyunca gülməməsini əsas gətirsələr də, müğənni onun xarakterinin bu cür olduğunu söylədi.

Könül Kərimova: “Öz məclislərində elə yaxşı gülərüz idi ki. Bu, onun xarakterindən irəli gəlir. Hətta bir dəfə nişanda zarafat da etdim. Gedib yanına dedim ki, ay Orxan, biraz üzün gülsün də. Elə bilərlər ki, qızı sənə məcbur vermişəm. Gülür, gülür, sonra görürəm yenə sakit dayanır. Tanısaz, həyatta tamam başqa bir insandır”.  

Müğənni qızını gəlin köçürdükdən sonra, oğluna da toy edəcək deyə, müəyyən söz-söhbətlər yayılmağa başladı. Ancaq əslində...

Könül Kərimova: “Kim bu dəqiqə bekardır ki. Hamının könlündə kimsə var. Ancaq hələlik oğlumun evliliyi ilə bağlı real heç nə yoxdur. Zarafatla bir söz deyirəm. Sonra evdə hamı üstümə düşür ki, sən niyə elə dedin? Sonra görürəm ki, haqlıdırlar”.

“İnanın ki, hələ oğlumu evləndirməyi düşünmək belə istəmirəm. O qədər yorğunam ki. O gün biri deyir ki, oğlun Rəşad üçün nə fikirləşirsən? Cavab verirəm ki, heç nə fikirləşmirəm. Mən dincəlmək istəyirəm”.

Əvvəllər oğlunun musiqiyə marağının olduğunu söyləyən Könül Kərimova sonra bəs nə oldu Rəşad bu sahədən birdəfəlik əl çəkdi, indi açıqlayacaq.

Könül Kərimova: “Oğlum 5-ci sinifdə oxuyurdu. Forte-piano fakültəsinə qoymuşdum. Düşündüm ki, bəlkə fakültəsini dəyişim, onu ifaçılığa qoyum. Bir gün dedim ki, oxu, qulaq asım. Uşaq başladı oxumağa. Elə gözəl ifa etdi ki, sevindiyimdən gülmək tutdu məni. Uşaq ağlamağa başladı. Dedi ki, belə nə olur olsun, dədən ölə, nənən ölə oxumayacam. Başa sala bilmədim ki, xoşuma gəldiyi üçün güldüm”.

“Bu yaxınlarda dedilər ki, Rəşad gizli-gizli mahnı oxuyur. Səsyazmasını gətirdilər, qulaq asdım, hiss etdim ki, nəsə var”.

Biz də sonda sənətçiyə ailə həyatında və yaradıclığında uğurlar arzu edirik.

Qeyd edək ki, "ARB Ulduz"  kanalını  Azərspace 1 peykində 11024 tezliyində,  polyarizasiya: (V), FEC 5:6,  symbol rate: 12698 izləyə bilərsiniz.